Biomassereguleringane i norsk lakseoppdrett: Verkemåte, tilpassingar, verknader og konsekvensar

Sidan 2004 har norsk lakseoppdrett vore regulert av restriksjonen ‘Maksimalt tillaten biomasse’ (MTB). Det er uråd å halde nøyaktig kontroll med faktisk biomasse og det rår stor uvisse om kor mykje ein kan produsere utan å kome i konflikt med reglane. Her lanserer vi ein budsjettmodell for bruk til biomassekontroll. I denne rapporten gjennomfører vi vidare nokre budsjetteksperiment med sikte på å avklare korleis biomasserestriksjonane avgrensar produksjonspotensialet under visse produksjonsvilkår og på verknader av ulike endringar i kontrollregimet. Norsk oppdrettsstatistikk syner at næringa fekk om lag dobbelt så mykje ut av kvart løyve i 2015 som ti år tidlegare. Budsjett-eksperimenta syner at det bør vere mogleg å auke produksjonen 20% til under gjeldande regime, men at ein også då ligg 25% lågare enn det ein kunne produsert med same smoltmengda om ein hadde sløyfa heile biomassekontrollen og knytta reguleringane til input- og/eller output-kontroll.